9 იანვარს, დაბა ბაკურიანში ორგანიზაცია „საქართველოს ალიანსი უსაფრთხო გზებისთვის“ და ტექნიკური ინსპექტირების ყველაზე დიდი ქსელი „გრინვეი“, „გალფის“ ბენზინგასამართი სადგურის ტერიტორიაზე ავტომობილების გამონაბოლქვის შემოწმებისა და საზოგადოების ცნობიერების ამაღლების აქცია გამართეს. აქცია კამპანია “სუფთა ჰაერისთვის” ფარგლებში განხორციელდა.
ღონისძიების მიზანი იყო, როგორც ქუჩაში გამონაბოლქვის კონტროლის დანერგვის საჭიროების ხაზგასმა, ასევე მძღოლების ცნობიერების ამაღლება სატრანსპორტო საშუალებების ტექნიკური ინსპექტირების მნიშვნელობაზე.
„2019 წლის 30 ნოემბრის მონაცემებით, საქართველოში ტექნიკური ინსპექტირება დაახლოებით 718 700 სატრანსპორტო საშუალებამ გაიარა. აქედან, პირველადზე წარმატებით გაიარა – 311 609, დახარვეზდა – 405 276. გზებზე გადაადგილება აეკრძალა – 1063 ავტომობილს. განმეორებითი ინსპექტირება წარმატებით გაიარა – 303 755, ხარვეზი დაუდგინდა -19 892, გადაადგილება აეკრძალა – 170 ავტომობილს. განმეორებით ინსპექტირებაზე (სავარაუდოდ) გამოცხადდა სულ – 304 200, განმეორებით ინსპექტირებაზე (სავარაუდოდ) არ გამოცხადდა სულ – 73 869.
ინსპექტირების რეფორმა მეტად მნიშვნელოვანია ტრანსპორტის გამონაბოლქვის შესამცირებლად და ჰაერის ხარისხის გასაუმჯობესებლად, თუმცა ცნობიერების სიმცირის გამო მძღოლები ერთჯერად მანიპულაციებს მიმართავენ და ინსპექტირების გავლის შემდეგ, მათი სატრანსპორტო საშუალება კვლავ აბინძურებს გარემოს“,- ნათქვამია ინფორმაციაში.
აქციის ფარგლებში, კომპანია “გრინვეის” კვალიფიციურმა პერსონალმა სერტიფიცირებული აპარატურის მეშვეობით კონკრეტულ ავტომობილზე გაზომეს გამონაბოლქი და დაადგინეს მასში CO-სა (ბენზინზე) და კვამლიანობის შემცველობის ოდენობა (დიზელზე).
გარდა გამონაბოლქვის კონტროლისა, მძღოლების სურვილის შემთხვევაში სატრანსპორტო საშუალება შემოწმდა რიგლოსკოპის გამოყენების მეშვეობით ფარების სინათლის ნაკადის მიმართულებაზე, რაც საგზაო უსაფრთხოებისთვის მეტად მნიშვნელოვანი პარამეტრია.